內地經濟未出現見底訊號，唔單止投行爭相下調今年嘅GDP預測，經濟專家睇淡經濟前景嘅言論亦都滿天飛，地方政府官員聽落相當刺耳。
重慶市市長黃奇帆近日就忍唔住向班經濟專家開炮，勁彈佢哋愈嚟愈「八卦化」，完全靠唱衰中國嚟吸引市場嘅注意力。
佢又出口術為市場打氣，話中國經濟增長率相比其他國家仍然好高，而且有厚實嘅「避彈衣」，足以抵禦風險。
講到「避彈衣」，黃奇帆話中國有成三件咁多，仲件件有3萬億美元，厚度十足，第一件當然係我哋嘅外匯儲備，見到都「肅然起敬」，第二件係中央同地方債務，依家距離國際安全警戒線嘅差距，大致上都有3萬億美元，而第三件就係央企同國企嘅淨資本，萬一有事，政府都可以賣一部分套現救急喎。
黃奇帆批評班經濟專家討論問題好似娛樂節目主持人，好易唔記得呢啲中國經濟嘅「基本特徵」，成日用歐洲嘅問題嚟嚇人，人哋病我哋就跟住食藥，好易會食錯藥。
黃市長呢頭出口術為市場打氣，上海市副市長屠光紹就喺嗰頭為內地股市開藥方，由內地當紅嘅電視節目「中國好聲音」聯想到股市，話要好似「好聲音」咁，經過「海選、調教、盲聽、PK、公開」等階段，去蕪存菁，先可以打造「中國好市場」。