做女鞋起家嘅達芙妮（00210）同加盟商勢成水火，呢邊廂做拖鞋、涼鞋嘅寶峰（01121）就「三囍臨門」。
寶峰尋日喺銅鑼灣時代廣場附近一帶開第二間經銷零售店不特止，CEO陳慶偉仲親口預告，北京首間自營NBA概念店會趁下周一「十‧一」黃金周開店，仲有新廠，初步選址已定。
絲絲聽寶峰嘅香港經銷商負責人講，呢間銅鑼灣地舖租金唔平，貴過隔籬舖位，今次租期大概兩至三年，睇市場反應，可能明年再開多間。
不過，陳總就話，香港消費者多數買其他外國品牌，所以公司業務重點主要喺內地，內地經銷店會喺「十‧一」黃金周進行唔同程度嘅促銷活動。
寶峰有心擴大銷售網絡，都要產能配套同步增加先得，難得寶峰真係話咁快就有好消息。
陳總又透露，新廠房暫時決定喺安徽宿州，公司仲簽埋意向書，新廠用地面積約300畝，估計買地投資幾千萬人仔左右，不過項目就分幾期開展，所以公司都唔會一下子使好多錢。