絲絲講場：星展鍾少權上前線送雪糕

近排秋天嘅味道愈嚟愈濃郁，但係下午好多時仲係熱辣辣，有得食吓雪糕都幾透心涼。星展香港零售銀行董事總經理兼豐盛理財及分行網絡業務主管鍾少權（Derek）就度咗條橋，突然「落區」送雪糕冧同事。

Derek今次為咗慰勞同事，特登租咗部雪糕車，扮成流動雪糕車隊，一日之內走勻港九新界所有分行，整雪糕畀900個同事食，連Derek自己都落手落腳整軟雪糕，十足雪糕佬上身，真係整到手軟。

除咗送雪糕之外，Derek仲另外訂咗一批粉紅色心形蛋糕，用嚟多謝前線班同事，啲同事收到時以為過緊情人節，就好似收到honey嘅甜蜜蛋糕一樣！Derek話成個活動唔單止係感謝同事，仲要向佢哋推廣吓，對外嘅客戶服務質素應該要點做至好。

絲絲覺得Derek對同事咁有心機，即係話畀同事聽，佢哋間銀行職員對客戶要諗更多驚喜，唔知第日分行會唔會抄橋，客戶經過分行，行入去會有雪糕食呢？中秋嚟緊，食住月餅先都仲得。

余詩韻