古時皇帝會微服出巡，體察民情，現今就流行神秘顧客，試探服務質素。證券行分析員都經常周圍睇，收集數據做分析，好似日本野村證券，就派經濟學家周圍飛，去唔同國家，試吓銀行嘅按揭服務質素得唔得！
野村首席經濟學家辜朝明，走遍德國、西班牙同美國等地，佢嘅秘密任務，就係扮成一個想買樓嘅準買家，行入銀行了解吓佢哋嘅按揭計劃，做個比較。
辜朝明話美國嘅銀行令佢最驚喜。佢「幫襯」嘅係美國大型金融機構，發現佢哋為咗爭多啲按揭生意，出咗幾招吸引班準買家。例如幫借貸人供第一個月還款，上限係2,500美元；如果借貸人肯畀多少少利息，按揭成數可做到九成半，比一般按揭嘅八成多一截。另按揭息率亦會自動調整到一個最新同最低水平，過程仲唔使浪費借貸人嘅時間簽任何文件添。
佢冇咁多時間去比較晒全美國嘅銀行，唔知道係咪每一間都有優惠措施。不過，如果其他機構嘅態度都係咁積極進取，相信會支持到美國樓市！
余詩韻