早個禮拜宣布完成前列腺癌放射治療嘅股神巴菲特，佢助手向外界講，股神聽從醫生建議暫時避免外遊，將會缺席今年嘅《財富》五百大最具權力女性年會，呢個會議股神過去三年都有參加，但為咗休養身體，只好臨時甩底，相信大會都會體諒同送上慰問。
據專家講，接受完放射治療後，一般都會有副作用，但就會喺兩至八個禮拜間慢慢改善，希望如股神自己所講，要做世界上最長命嘅人啦。
講番呢個會議，將會由十月一日起一連三日喺加州舉行，今年主講嘉賓除咗高盛舵手布蘭克費恩之外，仲有兩位女強人，就係聯邦存款保險公司（FDIC）前主席貝爾同埋前美銀環球財富及投資管理總裁克拉切克。
至於今年嘅《財富》五百大最具權力女性排名，榜首係巴西國營石油公司Petrobras嘅舵手福斯特。喺頭50大之中，只有三個中國女性，當中兩個姓孫，分別係排17位嘅華為董事長孫亞芳，同排41位嘅摩根士丹利亞太區聯合首席執行官孫瑋，另一位就係排名30，格力電器董事長董明珠。
余詩韻