歐洲央行月頭宣布無限量買債，由始至終企硬反對嘅德國央行行長魏德曼繼續語重心長警告，佢最近引用咗德國著名文學作品《浮士德》，比喻歐央行畀魔鬼游說印銀紙。
今個月議息會入面，唯一投反對票嘅魏德曼，向來喜用充滿色彩嘅形容詞嚟力勸歐央行唔好買債，早前話過買債係「糖衣毒藥」、「猶如染上毒癮」等等，搞到德國財長朔伊布勒都忍唔住要提醒佢咪同歐央行公開駁火，以免打擊公眾信心，但都禁唔住魏德曼比喻諷刺鋪癮。
魏德曼日前喺一個演說度話，《浮士德》前半部講到神聖羅馬帝國負債纍纍，魔鬼見狀就游說國王以未採出嘅黃金做抵押，大印銀紙，解決經濟危機。
起初國民消費力增強，帶動經濟增長，達到減債成效，但同時引發通脹，貨幣貶值大大破壞貨幣制度，後來民眾發現國家根本無黃金嚟做抵押，結果釀成社會騷亂同埋叛變。
魏德曼無直接話歐央行同《浮士德》嘅神聖羅馬帝國類同，但唔使問阿貴都知佢講乜啦。
佢又話貨幣政策嘅獨立性固然必要，但唔足以維持公眾信任，而避免印銀紙誘惑嘅最佳方法係擁有一個啟蒙又穩定嘅社會。