有價自然有市，QE3搞到金價係咁升，不法之徒仲唔趁好價，整啲假金條應市！絲絲記得喺舊年，香港有金行收到假金，老行尊都話分辨唔到，金行稍一不慎即做「水魚」。但絲絲估唔到作為國際黃金市場嘅紐約，不法之徒略施雕蟲小技，就輕易魚目混珠，令商人誤墮陷阱，真係老貓燒鬚喇。
話說受害人Ibrahim Fadl畀咗大拿拿10萬美元買金條，諗住對方之前都好老實咁賣真金，又show晒金條編號、出世紙咁，就不虞有詐。
直到受害人聽聞有假金流入紐約，先至醒覺走去驗下金條，發現裏面全部都係鎢，慘被搵笨。
一條10安士嘅金條價值1萬8千美元左右，一條外金內鎢嘅金條，成本約3千6百美元。個啲盛惠10萬美元嘅外金內鎢嘅金條，折返只係值2萬美元，受害人足足被人呃咗8萬美元，真係陰功囉。
連紐約都有人不幸上當，唔知香港各金行又有冇收到可疑金條呢？絲絲問過周大福（01929），佢哋就話冇聽聞呢啲外金內鎢嘅金條流入香港，不過同行耐唔耐都會收到假金，所以公司內部都有一系列嚴謹嘅驗金程序，要核對清楚金條嘅正本發票、重量、成色等等，若果真係有懷疑，仲會徵詢客人同意，燒吓啲金驗清楚有冇混入其他雜質。