絲絲講場：新地義工隊十年做八萬個鐘
香港唔少大企業，都有服務社會嘅習慣，部分仲成立咗自己嘅義工隊，好似新鴻基地產（00016）旗下嘅義工隊咁，就更加係其中最有規模之一，唔經唔覺，原來已經成立咗十年，服務總時數更達到八萬小時咁多。
單係睇義工隊主席由新地聯席主席兼董事總經理郭炳聯親自出任，就可以知道佢哋係幾咁重視呢項服務啦。「新地義工Team力量」成立至今邁向十周年，義工總人數已經突破2,000人，多年嚟透過不同嘅服務將愛心傳送到社會各個階層，舊年義工隊嘅服務總時數更加創咗新高添。
郭炳聯親自表揚
有咁好嘅成績，郭炳聯仲親自表揚義工隊，獲社會福利署頒發嘅最高義工服務時數金、銀、銅獎嘅新地義工有約260位，另有約30個義工家庭同時獲得嘉許。郭炳聯同絲絲講，佢自己同埋其他管理層亦都身體力行，同各位義工同事攜手投入義工服務，完全展現出集團『以心建家』嘅理念。