絲絲講場：華懋起酒店 活化做先鋒
香港嘅工業區其實都冇乜工業味喇，政府於是推行工廈活化，唔好浪費咗啲建築物，無論改建做住宅定係其他用途，都引起好多市場回響。
華懋集團喺觀塘嘅新酒店，行先咗好多步，幾年前已重建工廈做酒店，依家落成咗。睇嚟政府成日講嘅「起動九龍東」，又多個樣辦項目。
觀塘工廈首批准改建
絲絲嘅地產界前輩講，政府喺○○年初提出工業區轉型為商貿地帶，如心艾朗酒店現址地皮，就係當年區內首批獲准重建酒店嘅項目之一，據聞拗補地價都拗咗好耐，由原先每方呎約2,000元，減到1,200元至拍板，涉資超過1.7億元，華懋差啲因為補地價拗唔掂數，考慮放棄發展酒店，改為興建商業物業。
好彩最終都OK晒，依家已經落成埋添。龔生話，喺政府一連串「起動九龍東」計劃之下，觀塘成為咗近年區內發展得最快嘅地方，更加有唔少甲級商廈同埋大型商場進駐，遲啲仲會有埋郵輪碼頭，所以就非常睇好精品商務酒店喺呢區嘅發展潛力。
如心艾朗入住率九成
除咗響應「起動九龍東」之外，龔生對政府其他政策都非常支持，留意工廈改建做住宅呢類機會。
如心艾朗酒店依家入住率已經差唔多去到九成，佢話好滿意，明年初仲會喺九龍西開一間酒店及服務式住宅，同時亦都計劃喺中國開酒店。對於近期時不時傳出，龔系上市公司有注資活動，佢尋日就話暫時冇計劃喎！
余詩韻