事實證明，口術根本對實體經濟唔會有任何作用，樓價問題始終歸結番原因係供求失衡方面，一日供求失衡問題未解決，樓價居高不下已成定局。加上內地客搶盤大小通吃，小型盤買少見少，樓價灼熱程度有其實質支持，並非只得個炒字。
梁十招出台之後，樓價照破頂，內地豪客更懶理一切，喺一、二手市場搶盤。事實上，內地日打夜打，樓價被按住唔放，咁對於內地客嚟講，又想投資地產升值，有咩就手得過香港樓？呢點唔難理解。面對近期樓市瘋漲，梁特首推出十招短中長期措施，目的係穩定樓市。到底有冇效？比較好似有料到嘅，算係將最先嘅一千個置安心轉租為賣。
金融市場入面，流通量高嘅地產股亦已經炒到二、三線，又有資金玩尋寶，吼二三線磚頭股，貪有數得計。依照目前嘅樓價走勢，計番每間公司嘅賣樓收益以及市帳實值，好多基金都唔理三七二十一，見磚頭同條數掂就照掃。金融市場如是，樓市如是。
二○○七年，大家已經開始提醒住宅開始有少少熾熱，但係房屋政策冇絲毫改變。當樓市嘅上升變成民生議題，代表社會已增添許多不穩定元素。到○八年時，內地推行4萬億元人民幣救市政策，內地資金氾濫，當中有唔少落咗嚟炒股炒樓。目前嘅樓市，夾雜住以往美國量化寬鬆令港元弱勢，加上內地泵水引水灌田等等嘅力量，又點會咁易被壓落去？
當然，Prof. J覺得一個社會要穩定，必須要一個穩定嘅樓價；不過，想還想，種種現象分析，樓價仲係要升。
香港大學電子金融服務榮譽助理教授 徐燦傑