唔好以為借錢就等於山窮水盡，原來都可以好正面o架，話說花旗銀行委託港大，做咗個市民借貸調查，訪問咗超過1,000個月入過1萬嘅市民，唔少人借錢嚟進修，裝備好自己，呢筆錢自然搵得番，仲有高回報添！
花旗銀行環球個人銀行服務信用卡及無抵押信貸業務總監伍楊玉如（Maggie），尋日同絲絲分析，喺受訪者裏面，有31%話依家有借入無抵押貸款，其中有五分之一表示借錢係為咗進修，Maggie話：「依家市民愈來愈識增值自己，呢幾年息口咁低，私貸利率更低至3厘，就算借錢嚟讀碩士或者博士，第日個回報都可以cover（補償）到個成本啦！」
借咗私貸嘅受訪者，平均欠債7萬元，即係等於月薪嘅2.7倍，每月平均要還7,900元，調查仲有個有趣發現，原來男性比女性借錢嘅機會大兩倍o架！Maggie猜測係因為男性要擔起頭家，女人有老公養，佢仲講笑話為咗吸引目標客戶群，花旗嘅私貸廣告都起用美女，果然係異性相吸喎。
余詩韻