內地人喺境外買樓買寫字樓嘅個案，可以話係又多又豪。最近就有消息話，SOHO中國（00410）主席潘石屹，孖埋老婆張欣，會買起美國紐約麥迪遜大街嘅地標建築索尼大樓（Sony Tower），佢哋仲去過現場實地考察。呢個消息並冇惹起大家嘅懷疑，直情完全信晒添，反而係潘石屹就自爆話冇咁嘅事，佢仲話「我去過故宮，能說我把故宮買下來嘛？」
索尼大樓估計價值7億至10億美元，一直盛傳將再度易主。潘氏夫婦早前的確係去過索尼大樓，仲係跟地產經紀一齊去，可能係呢個組合，令大家一廂情願地相信，佢哋去「睇樓」，仲傳話達成交易嘅成數好高，會由潘氏夫婦旗下嘅Capevale Limited公司名義買下呢個物業。
索尼大樓之所以咁出名，係因為佢印證咗兩大集團嘅命運。索尼大樓原為美國電訊商AT&T總部大樓，AT&T喺七十年代壟斷美國市場，公司業績如日中天，為咗盡展電訊一哥風範，就打造出呢幢奢華浮誇嘅大樓。到咗八十年代，日本經濟快速冒起，晉升為世界第二大經濟體，日本人喺紐約市場嘅氣勢一時無兩。
AT&T則陷入反壟斷風波，規模大不如前，日本世界級電子企業索尼（Sony）喺1992年就趁機買下AT&T總部大樓，見證日本當時輝煌嘅經濟實力。
十年過去，中國經濟急起直追，成績有目共睹。雖然購買索尼大樓一事未必屬真，但無可否認中國投資者已經衝出中國，到紐約市場尋求更多嘅投資機會，展現出不容小覷嘅經濟實力和地位。
余詩韻