呢期電訊界最hit嘅話題就梗係盛傳蘋果公司快將發布iPhone 5啦！iPhone真係為電訊業掀開新嘅一頁。事關以前流動電訊公司為佢哋嘅3G流動數據業務想盡辦法，但搞極都係半紅不黑。士別三日，依家流動數據業務已成為流動電訊商嘅核心動力。八月尾，連數碼通（00315）都推出埋4G服務，搶佔市場。由3G升級去4G，客戶上網快咗，公司盈利跟唔跟度齊齊升級呢？
Prof. J成日都話左圈（客戶嘅要求）同右圈（公司嘅能力）要配合先可以發揮最大優勢。未有iPhone之前，右圈勁過左圈，3G服務並唔係客戶嘅需求，所以流動數據嘅優勢無效。但依家你叫Prof. J 唔好用流動數據，返璞歸真，諗吓都真係幾唔慣。發展4G服務，係提升流動電訊商嘅競爭力，更加滿足客戶嘅要求，但同時藍海又隱約有變紅海嘅趨勢，走唔出減價戰嘅宿命。
隨着有內地流動電訊商推出「平絕全港」嘅4G服務後，數碼通亦宣布，旗下所有3G客戶嘅服務套餐都會自動升級為4G，即係客戶只需要畀3G月費，就可以享受更高速嘅4G服務。服務升級，月費照舊，即係變相減價。
如果要喺呢個逐漸染紅嘅藍海生存，流動電訊商必需要具備一些特質去區別（differentiate）自己，從了解左圈而去定位，月費最平？速度最快？上網最流暢？清晰嘅定位先搵度自己嘅空間同價值。
話雖如此，Prof. J認為如iPhone 5出爐，亦係蘋果公司的觸發點，勢必掀起新一輪換機潮，有助帶動客戶人數增長，密切期待4G世代嘅來臨。
香港大學電子金融服務榮譽助理教授 徐燦傑