內地經濟遲遲仲未見底，好多企業老總心慌慌之下，都想聽下經濟學家意見，睇下「十八大」之後中央可以用咩政策挽救經濟。不過，阿里巴巴主席馬雲就大唱反調，話其實企業家先係最貼近市場嘅「春江鴨」，而所謂經濟學家研究嘅係已成過去嘅數據，如果要企業家去聽經濟學家嘅話，相信啲企業家已經死咗一半。
馬雲擺明唔睇好經濟學者嘅救市建議，仲好直接咁話，中國根本冇幾多個真正優秀嘅經濟學家，根據佢個人意見，啲經濟學家最鍾意嘅，係用數學模式去分析尋日嘅數據，但企業家有興趣嘅係「未來」。
如果要佢哋去聽一個對尋日有興趣嘅人嚟判斷未來，係令人悲哀嘅事，相比之下，不如去聽下消費者同市場聲音，因為呢啲先真正可以決定到未來。
馬雲相信世界經濟只會變得愈嚟愈差，大家唔可以諗住靠政策或者資本打救，要擺脫困局一定要發揮企業家精神，靠自己嘅創新同努力。
佢想話畀班企業家聽嘅係，十年之後，成功嘅企業一定比今日多，有錢嘅人都一定比今日多，不過如果你去聽經濟學家嘅說話，咁有錢嗰個一定唔會係你嘞！
余詩韻