雅天妮謝太謝絕採訪
雅天妮（00789）尋日嘅股東會認真墟冚，原因咪就係最近公司新聞多籮籮，但到依家為止，非執行主席謝超群嘅老婆、現任副主席兼行政總裁葉英琴都未蒲過頭，大家惟有嚟股東會碰下運氣喇！絲絲去到現場，見到嘅係公司關晒門拉埋閘，門口仲貼咗張紙表明唔接受訪問，但我哋梗係唔會咁易放棄啦。
等咗好耐，終於有個公司秘書出嚟交代，話啲管理層已經走晒，而所有議案已獲得過半數通過咁話，會上有唔少股東提問過謝生嘅狀況，謝太就交代話依家謝生喺醫院休養緊，情況正常。秘書仲大派定心丸話，公司業務運作一切正常，不過謝太啱啱先接手，要等到「上手」之後，先再出嚟同傳媒見面。
多金屬朱總因病退任
其實絲絲就覺得啲上市公司透明度愈高，對公司同股東都係好事，所以希望謝太搵個時機出嚟講幾句，釋除市場疑慮，始終難得仲有小股東話對公司好有信心喎！
講開又講，近來好似多咗上市公司董事有病，除咗雅天妮外，中國多金屬（02133）尋日都公布，話執行董事及行政總裁朱曉林辭任，原因係最近確診有疾病，健康狀況轉差，並且畀醫生強烈要求立即停止一切職務，以尋求及時治療令身體康復咁。嘩，咁嚴重真係要休息吓啦，健康永遠第一位！