本周六（十五日）係「投行巨人」雷曼兄弟倒閉四周年，今天當你走過中環街頭，仍會見到有雷曼苦主因為未能獲得合理賠償，而與銀行抗爭到底。孖妹見到呢個場面，彷彿仲感覺到○八年金融海嘯嘅餘震。經過四年「復原期」，到底你嘅投資翻身未？我哋幾經辛苦，左問右問，捐窿捐罅，終於搵到四個「有人歡笑有人愁」嘅嘯後故事！
有股壇「開心果」之稱嘅靈獅控股董事總經理藺常念，○七年底喺跑馬地買咗個1,300呎單位，當年以1,500萬元買入，持貨至今，帳面賺咗一倍，單位升值至3,000萬元。不過，佢就講明，層樓唔會賣，因為要留返畀兩個寶貝女。
人生何止一個金融海嘯呢？藺常念坦言：「每次環球股市出事，我都中招，惟有二千年及海嘯前的○七年最叻，無事之餘仲執番身彩。○八金融海嘯未爆之前，股市未冧，但樓價已經開始由高位下跌，於是我就沽咗一半股票，套現拎去做買樓首期，到之後要搞裝修嗰啲嘢，就再賣多四成股票套現，所以現在手上只有一成貨。」
投資最怕「蘇州過後無艇搭」，藺常念哈哈聲咁笑說：「買樓係我人生中最幸運亦最成功嘅投資，好彩當時我賣咗一半股票，如果唔係依家真係周身泡！真心嗰句，呢層樓真係救咗我一命。」
靈獅 藺常念
雷曼兄弟「執笠」，令股市跌進黑暗深淵，當年「中招」嘅散戶可謂多不勝數，馬生就係其中受害者，一場金融海嘯，令佢立即「蟹貨」上身。四年後，馬生依然每天準時返證券行「返工」，但投資行變為「齋睇，少幫襯」，佢坦言：「梗係要日日睇住價位喇，只要蟹貨價返到家鄉，就即刻沽貨走人嘛！」
有人「蟹」迷債，馬生就「蟹」股票，當中包括滙控（00005）、電盈（00008）、工行（01398），以及其他無謂再講嘅股票號碼。「當時我用6蚊買工行，點知金融海嘯後，歐債危機就跟住嚟，拖累內銀股前景，依家惟有收息囉！咁我又有啲滙控，當年佢跌到落38蚊時，嚇到我驚住咁沽晒；後尾佢升返上60幾蚊，我又買番啲，點之就坐貨坐到今日，總之等佢升番上80蚊就走貨啦。」
散戶 馬生
近期金價回升到每安士1,700美元水平，但灝天貴金屬副總裁孫裕生就話，○七年六月時金價最低見過640美元添呀，嗰時雷曼兄弟都未宣布破產呢。嘩！孖妹真係發夢都諗唔到四年前後，金價升咗約1.6倍。可惜當年我哋初出茅廬，鍾意鑽石多過黃金呀。
相反，孫裕生就聰明女啦，喺美國開始浮現次按危機初期，就睇好金價，○七年底已經識得買黃金做對沖，長線去銀行買黃金簿仔及金飾；短線則做現貨金、倫敦金，一個浪一個浪咁去買賣。佢話：「大家經歷過股災，但金融海嘯真係第一次聽，市場及投資者難免措手不及，通常呢個時候黃金嘅避險作用就會發揮，所以當時雷曼爆煲，買金一定無錯。」
孫裕生投資黃金嘅平均買入價約1,000美元，四年前投資嘅黃金簿仔和金飾都未沽，佢話：「唔會沽喇！啲金飾平時出街都會戴吓，如果睇中又靚又新潮嘅款式，都會再買。」
灝天 孫裕生
全球首隻人民幣可交收期貨合約即將上市，可見投資人民幣嘅重要性日益增加，而GMO CLICK環球通副總裁陳健豪早就睇好人民幣嘅投資價值，早於○七年宣布匯改時，就開始定期定額兌換人民幣，而雷曼爆煲後，環球股市更添上無限陰霾，美元不斷急升，惟人民幣升值勢頭值得長線睇好，所以更加堅定佢兌換人民幣嘅投資決心。
陳健豪表示：「由○七年開始，每隔兩至三個月，我都會換兩萬元人民幣，直至去年底停止加碼，因為已經儲到目標水平，依家做緊啲三個月定期存款。」
經孖妹屈指一算，估計佢嘅人民幣資產大約30至40萬，但呢個只係成本價，仲未計算過去四年來嘅升值、利息等增值回報。雖然近年人民幣升值幅度放緩，但佢就話暫時不會沽出，除非樓市回落，咁就會套現用作買樓首期喇！
GMO CLICK 陳健豪
成立超過一百五十年嘅雷曼兄弟破產引發全球金融海嘯，成為轟動一時嘅金融界歷史，印有雷曼標誌嘅物品就變得極具收藏紀念價值。當年雷曼兄弟為咗還債，更一度喺拍賣網站eBay上舉行大清倉，拍賣林林總總過去原來給予客戶及員工嘅贈品，好似有棒球帽、T恤、筆、毛巾及咖啡杯等等。
四年過後，美國經濟仍受餘波影響，在eBay上，大家可找到逾百樣雷曼兄弟嘅嘯後「遺物」，開價由數十至數百美元不等，但不少至今仍然無人問津。其中更不乏一些「騎呢」物品，如銀製雷曼咖啡壺連杯、電子保溫盤。
孖妹睇嚟睇去，發現最特別的是一個緊急疏散包，裏面包括疏散指示、防煙面罩、防煙眼鏡、迷你電筒及哨子，估計是九一一事件後，雷曼為防遇上恐怖襲擊，讓員工於緊急逃生時使用。不過賣家卻將它命名為「雷曼股災緊急疏散禮品包」，諷刺當年雷曼員工在公司閉倒前要進行緊急疏散。
另外，我哋仲搵到啲奇奇怪怪嘅物品，大家有興趣都可以去bid番件當留念㗎！話唔定，第日拎番出嚟轉手仲值錢呀。（不過近期網上成交其實相當淡靜㗎）
直接買入價：149美元
郵資：免費
孖妹bid唔bid：唔bid，睇嚟為乜？
直接買入價：259.99美元
郵資：15美元（海外）
孖妹bid唔bid：想bid，擺多廿年應該賣得仲貴！
直接買入價：每個賣11.99美元
郵資：3美元
孖妹bid唔bid：唔bid，山長水遠買file，當我哋傻o架？
直接買入價：29.99美元
郵資：免費
孖妹bid唔bid：唔bid喇！都唔啱我哋size！
高妹 彩兒
若有料報畀高妹同彩兒或有嘢問，可電郵money.biz@opg.com.hk