絲絲講場：紐約超豪宅月租117萬

美劇《Gossip Girl》講一班喺紐約上東城區生活嘅上流社會後生仔女，絲絲每一次睇嘅時候，都會幻想自己係佢哋一分子，住喺上東城區係身份象徵。呢度有間靚豪宅放售，絲絲一早知道買唔起，依家放租喎，一睇個租金，成個人彈開，就算減埋價都唔係絲絲杯茶。

呢間大宅叫Woolworth Mansion，係有近百年歷史嘅法國哥德式豪宅，由美國連鎖健身中心老闆Lucille Roberts擁有，Woolworth Mansion市值達9,000萬美元（約7億港元），Lucille喺一九九五年以600萬美元買入，舊年曾經放盤但冇人吼。

業主惟有放租啦，舊年以月租21萬美元放租，但撞啱美國經濟不景氣，吸引唔到租客，今次捲土重來，仲減到15萬美元（約117萬港元）吸引租客，希望佢今次可以成功出租啦！

聽落其實都好貴租喎，不過呢間大宅有10間睡房，3個廚房，同埋最特別係有11間浴室，如果一個超級大家庭租嚟住，除開條數，係咪都有得諗呢？