伯南克貴為美國聯儲局揸fit人，比起貪婪銀行家，佢嘅人工其實好低，唔知係咪平時冇乜錢剩，原來佢同屋企人合共持有嘅金融資產介乎107萬至228萬美元（約834萬至1,778萬港元），比起佢部分同事仲要少。除非佢有好多物業、古董、黃金揸手，如果只係揸住千幾萬退休，都唔可以過得太豪華喎！
聯儲局一班高層嘅身家，已經喺上年度財務報表度披露咗。根據美國政府規定，聯儲局理事每年都要披露佢哋同屋企人嘅財政狀況，但只需要畀範圍就得喇。
其實伯南克持有嘅資產真係唔算多，好似佢嘅副手耶倫咁，去年同屋企人持有資產介乎340萬至740萬美元，足足係伯南克嘅三倍！理事杜克去年就持有資產介乎407萬至960萬美元，另一理事拉斯金就有介乎137萬至373萬美元，所以話呢，伯南克有嘅真係唔算得係啲咩嘢。
人工方面，伯南克就按國會規定袋19.9萬美元，其他理事就袋17.9萬美元，都只不過係多人少少喳！
啲人成日都望聯儲局推量寬，但原來伯南克自己本身都係「放水」受益人之一喎！眾所周知「放水」有助推低借貸息率㗎喇，佢上年將層樓嘅按揭再融資，三十年期按息由5.375厘降至4.25厘。咁你話聯儲局下周三開始議息，伯南克仲想唔想「放水」啊？
余詩韻