近排周圍去，去到中國各大城市，都不得不睇吓每個商場入面到底發掘到乜嘢。祖國經過多年發展，事實上商業樓宇嘅質素已今非昔比，甚至乎好多項目都可以同香港睇齊。能夠做物業生意，係城市入面嘅地產項目游刃有餘嘅公司，身價自必然倍升，大家話係咪？
融創中國（01918）主要喺祖國做物業開發、物業投資、物業管理服務等生意諸如此類，都屬於地產範疇。公司嘅業績亦非常靚仔，大家真係要望多幾望。
單單睇番集團上年度嘅收入，有成106.04億元（人民幣‧下同），增加咗59.4%。咁高速嘅增長，背後當然有好多個故事！大家知道，祖國嚴打房價飆升，點解一隻地產股又可以有咁亮麗嘅業績？融創嘅銷售團隊非常優質，能夠喺市場入面搵到缺口，成功完成銷售目標，當中經過唔少辛酸。集團上年實現銷售額約192億元，比起之前一年多成130.5%，七除八扣埋成本，都令盈利有幾成增長。
以營銷市場學嘅概念講，當然，集團能夠締造如此佳績，主要得力於「策略得當」。佢哋訂下嘅「區域聚焦」同「高端精品」戰略，充分咁打入咗市場，難怪能夠與唔同公司競爭之下，亦能出類拔萃。大家都知目前中央針對房地產嘅調控已初見成效，雖然未即時放鬆，但優質嘅地產公司仍然可以安度寒冬，發展壯大。集團喺呢兩年都可以有咁亮麗成績，往後當然更冇有怕啦，係咪？
融創截至今年六月底止上半年收入為43.02億元，盈利為5.27億元。集團目前往績市盈率不足4倍，息率有2厘幾。繼續追蹤、出發！
香港大學電子金融服務榮譽助理教授 徐燦傑