渾水研究（Muddy Waters）係唔少中國上市公司嘅剋星，做過幾單大茶飯，即刻聲名大噪，喺大陸已經有人照辦煮碗，絲絲聽聞呢間「中國渾水公司」，更準確沽空SOHO中國（00410）、中信証券（06030）而喺網絡界揚名。
呢間公司聲稱喺上個月中，臨收市前40分鐘大舉沽空中信証券，而中信証券當日沽空額大增，股價跌9%，真係陰功。佢哋又聲稱成功狙擊喺香港上市嘅SOHO中國，沽空時仲講埋係有數據支持。自此一役，呢間公司經已成咗名，微博粉絲人數短時間內飆升到23萬人，相當巴閉。
據聞佢哋嘅主事人只有三十幾歲，擁有6年銀行投資部門的工作經驗、7年私募基金投資嘅工作背景，佢仲話要向外國研究公司偷師，幫手監察內地上市公司喎。