「民企之父」張化橋（Joe）重出江湖！話說Joe上年卸下投行銀行家身份，透過自家公司慢牛投資，入股做咗廣州花都萬穗小額貸款嘅董事長，仲話雖然無私奔咁浪漫，但依然好興奮，佢真係好犀利o架，同時孭住民生國際（00938）行政總裁個位，點知今年四月佢火速落船。當絲絲以為Joe疊埋心水，喺度搞小額貸款生意，點知尋日有個投行姊妹叫絲絲密切留意Joe好快會有新搞作！
Joe不停轉工，皆因佢係人才，機會梗係周圍都有！佢做咗深控（00604）首席運營官兩年半，就以「已提前完成董事會給出的任務」為由回巢瑞銀，但好快又走人。仲記得佢前排離開民生，話想有多啲時間休息，未來會努力做好萬穗，仲見佢喺博客話以具藝術家創意為條件，請番個行銷領袖做好萬穗條數添！
記得上次同Joe傾開偈，佢自認係「第一代渾水」，話做假帳嘅民企仲係太多，不過就送咗「民企未死」四個大字畀絲絲，繼續為民企護航，仲派埋貼士話「任何板塊」都可以買，真係好想快啲再約佢High Tea，聽下佢講有乜新大計！
余詩韻