Market Insight：內房龍頭保持強勢

連續兩日跌掉超過四百點的港股，反彈64點收報19,209點，但見滙控（00005）及騰訊（00700）兩隻股份已貢獻66點升幅，可見觀望氣氛濃厚的港股，反彈質素相當麻麻，高度集中個別股份身上。

友邦（01299）母公司AIG，手上一批為數22.4億股，市值590億元的友邦股份禁售期大前日屆滿，AIG要搵銀還畀債主美國政府，賓架界估計批股份唔等得，君可見七月份之後，友邦沽空佔成交比重持續高企，對沖基金都想沽低佢再執平貨，勢估唔到，AIG揀歐洲央行議息前幾個鐘頭開賣。

放大圖片

放大圖片

投行爭生意膽博膽

歐央行開大開細未知曉，若非有淡倉在手，夠膽攞貨嘅基金的確勇氣可嘉！配售定價25.75至26.75元，意味僅較友邦昨收市26.3元最多折讓2.1至1.7%溢價，今次配售6億股，話少唔少，佔AIG成手貨嘅26.7%，近期港股表現咁曳，AIG貨尾禁售期又得90日，承銷團德銀、高盛若非一早有客在手求貨，肯定係膽生毛。

無幾耐之前，古勝有老友半講玩笑提過，港股愈玩愈縮，為求生存，今年部分外資行為搶生意，無所不用其技，高層賓架心想既然年終花紅凍過水，索性博一博唔使咁頻撲，競投配售價時唔單折讓進取到離晒譜，部分甚至把佣金貼埋落個配售價，坐埋貨都在所不計，抱住「唔賭輸實，賭仲有一線生機」的心態。可惜聽聞近期幾單配售，投行揩嘢居多，完全係愈窮愈見鬼。

全年業績值得睇好

內地有所謂「金九銀十」，以往內房企業都把下半年賣樓焦點，鎖定呢兩個月，而持續接近兩年的內地樓市調整期，有迹象今年四、五月份結束。本來，內房公司高層對今年賣樓充滿憧憬，無奈溫總近日與一眾官員紛紛高調提出，鞏固樓市調控成果，抑制投機性需求，擴大中小的普通房供應，防止房價反彈。事實上，也見到有內地銀行開始「自律地」取消房貸優惠，房企出現有客唔敢加價，有貨唔敢大賣的情況，大家都擔心十八大前，觸動政府神經而催化新一輪壓樓措施出台。

年初估唔到樓市小陽春來得如此突然，房企銷售目標大都傾向保守，目前，內房股售樓相當於全年目標完成度，平均達到70%，就已公布八月份銷售數字的，越秀地產（00123）以達今年銷售目標96%排首位，其次是華潤置地（01109）85%，融創（01918）75%、富力地產（02777）62%、碧桂園（02007）60%。由近日樓市氣氛遠勝年初，全年內房股業績達標甚至超標機會是高唱入雲。近日潤地管理層估計銷售有望達500億元，較原先400億元目標多出近兩成五，或者，今年跑贏大市的內房股，是少數有條件繼續強勢的板塊。

資金游走不同板塊

鐵路股昨日成焦點板塊，發改委下發25個投資額總額達八千多億人仔嘅城軌項目批文，刺激鐵路股全線上揚，中國南車（01766）同南車時代（03898）兩隻孖寶升幅分別有8%及5%，中鐵（00390）、中交建（01186）及中國自動化（00569）升幅介乎6至13%。奇怪嘅係，其實呢個消息前日經已出現，偏偏前日鐵路股表現未有起動，其中南車喺周二股價更插近8%，周三仍然喺低位徘徊。

板塊升勢如此難捉摸，相信背後原因係依家魚缸淡靜，基金大戶買賣足以令個股表現大幅波動。至於話點解咁短時間內成個板塊又可以再炒起，估計同一批專門游走於不同板塊，如玩「碰碰車」搵食嘅炒作資金有關。昨日見到資金明顯流出濠賭股，舞起鐵路股，唔難搵到游資嘅蹤迹！

古勝