蘋果公司（Apple Inc）出品嘅新iphone，極有可能今個月十二號面世，數碼通（00315）特別揀喺前一日開放4G網絡上客，好多人都估管理層係唔係收到風，知道新一代iPhone將可配合香港4G網絡使用。不過數碼通總裁黎大鈞就話，自己今次都係賭一鋪，連佢都唔知蘋果公司當日會唔會有新機公布。
吓，又賭一鋪？據聞佢當年唔投新頻譜，都係賭一鋪喎！
黎大鈞話「無靚手機配合，太早出4G盞嘥時間」，公司較對手遲推4G亦正係呢個原因。佢又話外界質疑數碼通當年唔投新頻譜拓4G，會影響網絡質素同競爭力，但查實經過連串技術測試，已證明呢個唔係事實。
佢仲好自信咁樣話「當年唔投新頻譜，改以1.8吉赫頻譜搞4G，確係賭一鋪，但今日個個台都話要搞1.8吉赫嘅4G，證明我哋係贏左」。
講次次都話「賭一鋪」，查實係開玩笑啫，大家唔好咁認真！但好老實講，電訊呢類科技生意能否成功，確係好視乎能否掌握發展形勢。
佢尋日話，數碼通年初打算帶頭叫停無限上網，其實都可算係被對手跣左一獲，不過今時今日個個台喺無限上網都有公平使用量限制，正好證明任用模式有問題，至於數碼通日後又唔會再帶頭，改變收費模式。黎大鈞就話「唔知……話唔定第日係我哋跣返人呢！」
余詩韻