絲絲聽聞意大利豪華遊艇製造商法拉帝集團（Ferretti Group）有意喺中國建立廠房。
莫非以後法拉帝嘅遊艇都要變成Made In China？非也非也，其實今次計劃喺中國興建嘅只係裝配廠房，法拉帝嘅生產基地會留番喺意大利嗰邊。
法拉帝有水上勞斯萊斯嘅稱號，旗下嘅Riva遊艇過往幫襯嘅客戶包括約旦國王、西班牙國王、荷里活巨星伊利莎伯泰萊、蘇菲亞羅蘭、碧姬芭鐸同埋辛康納利等等。
聽山東重工業集團董事長譚旭光講，受歐債危機影響，令到遊艇嘅需求下跌，所以就要喺中國起間廠房，睇吓可唔可以喺中國、巴西、俄羅斯等新興市場提升銷售額。譚旭光仲話，廠房選址將會喺山東省嘅青島，因為青島係重要嘅海軍基地兼○八年京奧帆船賽嘅舉辦地點，喺嗰度造船就最適合不過。
不過，你哋有無覺得奇怪，點解會由山東重工嘅譚董發言呢？其實法拉帝喺○九年因為債務問題差啲破產，後來山東重工旗下嘅濰柴集團用咗2.2億美元，取得法拉帝七成半股權，成為法拉帝嘅大股東。
余詩韻