喺大陸上市嘅貴州茅台星期一停牌，絲絲嘅ibank朋友猛咁索料，係咪佢哋嚟香港上市有眉目，終於夜晚真相大白，原來要加價，復牌後股價升6%。
加價要停牌係啱，佢個股價同埋零售價一向驚人，絲絲嘅Uncle係正宗「茅躉」，早兩年如果識得跟佢衫尾，買番幾手，又或者買定幾支靚茅台，放喺屋企應急，依家都賺幾個開喇。
今次佢哋加嘅出產價都幾厲害，達到20%至30%，連埋舊年頭已提升過出廠價格，兩年內加價高達五成。茅台提價嘅消息，幾個月前已有傳言，今次揭盅嘅加價幅度，同傳聞一樣，都係200元（人民幣．下同）一瓶。
茅台酒過去嘅出廠價為619元，而茅台嘅渠道價格（自營店）為1,519元，其中有900元嘅毛利潤喺經銷商手裏，因此茅台提價可以回收渠道利潤，壓縮渠道商利潤。專家話茅台唔係汽車，好難喺數量上大升，加價係早晚嘅事，舊年因為政府有政策干預唔畀提價，今年喺無政策干預嘅情況下茅台提價時點合適。
余詩韻