全球第二大嘅互惠基金公司富達投資終於後繼有人，由董事長Edward Ned Johnson III嘅女兒Abigail Johnson登上接班人寶座。
現年82歲嘅富達董事長Ned Johnson雖然老而彌堅，但遲早有日要退下火線，咁外界自不然關注富達嘅接棒安排，偏偏Ned Johnson為人十分低調，從未透露過挑選接班人嘅事，等大家估餐飽。
曾經一度盛傳富達某幾位高層，好似前營運總監Robert L. Reynolds、前互惠基金銷售部主管Ellyn McColan都係大熱人選。不過，原來呢一切都只不過係煙幕，Ned Johnson一早屬意將家族持有嘅富達交畀愛女Abigail。
唔好以為50歲嘅Abigail係靠裙帶關係上位，其實佢自八八年就加入富達，幾乎所有部門都打滾過，今年更打入《福布斯》女富豪榜第九位，身家估計達103億美元。Abigail將負責資產管理、零售及機構投資者股票部門、退休投資等等業務，直接聽命於佢爸爸，可謂一人之下，萬人之上，絲絲希望佢兩父女可以一齊拍住上啦。