絲絲講場：國壽楊明生亮相賣口乖

國壽（02628）董事長楊明生今年上任至今，首次喺香港出席業績發布會，表現非常淡定，完全無怯場，而且非常健談，親和力十足，畀人嘅第一印象相當好。相反，前董事長袁力就畀人一種行政人員嘅感覺，不過，兩人有一個共通點，就係一樣有決心為國壽帶來新改革。

楊董一開場就話首次出席業績會，既興奮又欣慰，仲大賣口乖，話香港媒體最好。事緣國壽尋日出業績，佢今朝打開報紙，統計過各大媒體畀國壽嘅評分為中等偏上。

會後，佢問台下嘅記者朋友係咪「八十後」，仲話自己最鍾意同年輕人相處，更大爆自己個寶貝女都係「八十後」添！絲絲聽聞楊董仲邀請在場嘅記者齊齊上北京，品紅酒，做訪問，話要同年輕一輩交流一吓，在場嘅記者不知幾開心！

雖然楊董畀人嘅第一印象同前董事長袁力有啲唔一樣，但係絲絲覺得兩位都係有心人，相信楊董絕對有可能帶領國壽上下，走出痛苦嘅行業調整期！