絲絲講場：吳偉驄撐證監拆擋箭牌
呢期香港喺監管市場方面都算多事端，早前證監會開炮轟放生中國高精密（00591）嘅「國家機密」事件，要求高精密再度停牌，就搞到滿城風雨，日前證監會又以相同理由，要告標準水務嘅前核數師安永。
絲絲尋日撞到喺證監會做過副主席嘅吳偉驄，當然問吓呢位老行尊嘅睇法。佢一開口就撐「前老闆」，話證監會只係表明立場，告上法庭純粹係想立案例，等日後再有類似嘅事都可以有例可依。
吳偉驄同絲絲講揀間未上到市嘅公司嚟告安永，反映證監會喺處理上好小心，而且行動唔係想針對某一間審計行而做。對於啲內地公司嚟咗上市後就用國家機密做擋箭牌，佢話以前真係「聞所未聞」，又話中國對國家機密嘅定義太闊，呢種唔披露嘅做法對其他上市公司同小股東好唔公平。
證監老行尊無意出山
吳偉驄先後喺證監會、中證監同上交所出任要職，相當熟悉兩地監管情況，佢同絲絲講中央方面好明白事理，深明凡事係睇長遠，相信證監會行動前都同中證監方面溝通過。仲有啲感慨咁話而家整亂咗香港個市場，第日啲中國公司又點再嚟融資呢！
見吳偉驄仲咁留意香港監管方面嘅是非，絲絲當然問吓佢有無意加盟金融發展局，不過佢話無人搵過佢，好謙虛咁話自己年紀大唔會出山囉！
余詩韻