魚缸繼續悶局，主板成交升返去四舊樓上，錄得437億元，但扣埋銀河娛樂（00027）及光大國際（00257）配股上板後，實際原地踏步，市場焦點放在業績股身上，恒指開市見19,857點，即日高低波幅縮到去93點，埋單微跌23點，全日對住部機真係會悶到癲。
九月份期指除淨後低水，大家對後市審慎態度依舊。恒指牛證及Call輪好倉前日續有資金流入，涉及1,764萬元，牛證街貨再升，相當於7,333張對沖期指，同日熊證街貨相對期指只有4,154張。
牛證街貨跑贏熊證成條街，但大戶依然忍住手，未有殺落19,700點以下的重貨區防線，牛仔活多一日，唔代表海闊天空，周末之後將見真章。
焦點之一的中國人壽（02628）出業績，中期賺少咗26%，股東應佔溢利96.35億元，倒退唔係罪，至緊要同預期有無出入，因出來數據較預期略佳，新業務價值不俗，幾間大行畀like，股價昨彈近2%，贏晒其他幾隻內險股。
新一輪的內地旅客個人遊快殺到，下個月一日實行前會唔會有「程咬金」，Handsome哥欠缺這方面政治智慧，但尋寶揀零售股的同時，都唔好睇漏一眾地產收租股，據聞年來一線商舖勁加租的瘋狂已蔓延至三四線細舖，加一倍以下已叫做有良心的業主，加埋新一屆政府對樓市暫未手起刀落，地產Call可博，新地（00016）昨升1.1%，新地法興購（19300）今年十二月二十四日到期，行使價112.8元，實際槓桿13倍，引伸波幅28%。
Handsome哥