絲絲講場：蒙牛孫伊萍真人騷

蒙牛尋日發布中期業績，絲絲滿心歡喜，因為知道孫總會大駕光臨，所以一早霸定頭位。一開場由孫總present，猶如一個「個人秀」咁，真係巾幗不讓鬚眉！

佢仲話，今次係第一次代表蒙牛會見香港媒體，嚟會場途中已經知道有好多記者一早守候住，但偏偏遇上塞車，好驚遲到，好彩最終都有驚無險喎！

防偽技術嚴打篡改

孫總上任咗四個幾月，坦言話面對嘅挑戰好大，但成個團隊合作得好好，不斷強調會踏踏實實咁做，坦誠面對問題，目標令市場重新喜歡「蒙牛」呢個品牌同埋佢嘅產品。

對於近日蒙牛分區員工篡改產品生產日期，孫總話依家研發緊新嘅防偽技術，進入咗試驗階段，一旦研發成功，相信會對成個行業都會有幫助，佢仲強調話，為咗捍衞品牌，對不法分子絕不姑息添！