以平佣做招徠嘅耀才證券（01428），近年規模愈做愈大，星期一突然暴跌兩成，成交亦都飆升，令市場好意外，尋日至知原來係畀交銀國際掟貨。交銀喺耀才一○年上市時開始持股，耀才主席葉茂林現身解畫，估計可能係交銀內部政策轉變喎！
葉茂林話對呢件事都好愕然，因為事前無收過任何通知，雖然事後佢哋溝通過，但佢都唔知交銀沽晒未。絲絲睇番啲資料，交銀揸住耀才大約7.32%，即係約7,500萬股，星期一全日成交八千幾萬股，扣咗葉茂林同日增持2,000萬股，睇怕交銀都未沽晒喎。
耀才業績唔差，交銀作為第二大股東，又唔係無錢賺，真係「交銀內部策略轉變」咁簡單？
絲絲記得葉茂林講過，低佣政策唔係要搶本地證券行生意，目標係銀行散戶客，話晒交銀都有做證券，唔通真係因為有競爭？絲絲追問葉茂林係咪得罪咗人，佢隱誨咁話「可能係都唔定」，但唔會改變呢個目標市場。佢仲好維護交銀，話合作咁耐無重大分歧，對方亦給予好大自由度，用「再見亦是朋友」形容佢哋嘅關係，仲好強調話係估o架咋。