人稱「四叔」嘅恒地（00012）主席李兆基唔單只有股票投資名錄，逐隻寫低慢慢研究，佢仲時不時有金句，最新名句係「買股好過買樓」，言猶在耳佢自己亦都坐言起行，喺恒地公布業績嘅第二日就增持公司股份，涉及資金約238.9萬元。
呢排個市chok到大家都暈陀陀，之不過無阻四叔出手增持決心，相信同佢早排話好多地產股折讓幅度好大，普通住宅就因為供應多，升值空間有限有關啦！據聯交所資料顯示，四叔喺恒地出咗業績第二日，即喺23日就即刻增持公司股權，每股平均作價47.78元，增持5萬股，持股量維持喺62.55%。
尋日恒地收市價係48.3元，呢批貨即賺啦！不過，佢今次只係少少哋增持，金額唔夠畀佢哋出品豪宅嘅細訂，唔知佢會唔會繼續增持，畀投資者更明確方向呢？
同四叔好老友嘅鄭裕彤（彤叔），最近都有一句相類似嘅金句：「買珠寶好過買樓」，佢買旗下珠寶股周大福（01929）就話要公布啫，買珠寶又唔使話你知，絲絲都好難知佢幾時行動，淨係知佢近期密密減持澳博（00880）股份，上星期五又賣咗五萬股喇。
余詩韻