近期，業績同盈警基本上都係一個等號，不過，最緊要係透過每個個案好好學習，為未來作好準備，係唔係？
海升果汁（00359）發盈警，大家都預咗，需求減、成本高等等，隻隻都係咁講，啱啱出咗業績，中期盈利急跌99%，令我諗起一間公司盈利跌咗99%，股價仲創埋三年零八個月新低，都咪話唔恐怖。
睇解釋，如我所料，需求下跌，銷售減少，都係意料之內，預料之外在於佢嘅蘋果汁出口價格平均有22%增長，Prof. J都摸不着頭腦，需求下跌但價格又升，搞到我擁有嘅經濟學概念亂鬼晒，都唔知佢想講乜。
成本上升，固然係重點，但係上升幾多又唔講，作為投資者或者小股東，單聲我知都好，但係報告上面又隻字不提，我估海升應該同公關公司同投資關係部好好合作，免得大家睇咗好似無睇，係唔係？
Prof. J分析公司，跌由大圍就冇嘢講，只能夠睇管理層嘅核心能力有幾多。同行安德利（02218），盈利只係跌咗34%，似乎海升真係做得麻麻哋！再睇財務表又係麻麻哋，銀行貸款多咗50%，升到超過14.8億元，都係嗰句，「市好就無人理，市差就嚇死你」，加上手頭現金得2億元，要還嘅一年償還貸款又有成12.6億元，周轉上又面對多一層挑戰。要搵水，相信會向小股東埋手嘅機會最高，Prof. J希望佢哋諗諗計，幫小股東創造優質嘅價值啦！繼續追蹤，出發！
香港大學電子金融服務榮譽助理教授 徐燦傑