金融機構請人，唔係要佢哋搬番書本嘅內容出嚟，反而着重佢哋嘅洞悉能力，甚至會問一啲完全無關連問題，答案愈係天馬行空就愈好，金占士最近聽到兩個個案，大家不妨參詳吓。
某家國際知名I-Bank問應徵者，邊一樣電子產品，完全不受經濟周期影響，產品唔使點樣改革適應社會變遷，但又幾乎年年加價。聞說好多應徵者都被考起，金占士自問都唔夠資格加入呢間I-Bank，惟有靜雞雞問老友攞答案，原來呢個咁神奇嘅產品，就係計數機。
另一個個案就係上海復旦大學嘅考題，佢哋依家收緊新生，老友去咗面試工商管理碩士課程（MBA），佢話點都估唔到啲問題咁update。
其中一題問題係：「京東和蘇寧嘅價格大戰，你怎麼看？」老友話，電商大戰是近期熱門事件，事件發展仲係未知之數，比起討論經典案例新鮮刺激得多，與考生相關度較高，感受亦較深刻，可能激發到佢哋嘅思維。而且考生事先好難貼中復旦大學會出埋咁新穎嘅題目，要考佢哋嘅臨場發揮、對紛繁複雜嘅商業事件的認知、背後深層原因的分析及遠見預測，認真大挑戰！
一般商學院係招生面試，慣常採用經典案例，測試考生對商業社會的洞察力和經驗知識，咁考生自然可以努力刨書，有晒兩手準備先去面試。上海復旦大學管理學院依家馬不停蹄進行面試，招收一三年度工商管理碩士課程學生，不過據聞今次班面試官將啲熱門商業話題作為考生討論題目，又幾出其不意喎。