絲絲講場：恒生「千金難買」沈祖堯

分享秘訣助人為樂

沈校長話，有啲快樂係錢都買唔到，咁點先可以得到呢？秘訣就係「施比受更為有福」，要真誠地付出，幫助有需要嘅人，沈校長就以喺烏干達做義工時候嘅經驗作為例子。

同場仲有三位恒生員工分享佢哋「付出」嘅心得，話說佢哋參與咗恒生嘅再生勇士選舉，喺近一年嘅相處中，發覺再生勇士可能身體有殘疾，但就好堅強同厲害，話說有一位再生勇士雖然要坐輪椅，但就鍾意四圍去，恒生義工幫佢完成潛水嘅夢想後，自己都感到十分喜悅同感動。

精彩嘅演講令超過200位恒生員工獲益良多，連恒生副董事長兼行政總裁李慧敏都抽空聽足全程。