有「民企之父」之稱嘅張化橋四月自民生國際（00938）跳船，話想休息一段時間，當堂真係變得低調咗，只係得閒發表吓經濟分析咁，殊不知絲絲尋日好意外地，竟然喺綠城（03900）個業績會度撞到佢，唔通佢想做番老本行分析員？
綠城尋日喺萬豪酒店開業績會，絲絲諗住去湊吓熱鬧，點知到場嘅分析員實在太多人，直頭企到出門口，絲絲正想離去high tea之際，突然見到個好熟悉嘅面口，亞Joe（張化橋洋名）竟然坐喺門口等。
絲絲即刻同佢相認，笑佢貴為慢牛資本董事長，做咩都會嚟參加分析員會議，唔通有興趣投資吓內房股？Joe就承認自己都有睇吓啲內地房地產股票，至於點解寧願坐門口，都唔去旁邊同樣舉行緊分析員會議嘅世茂房地產（00813），Joe就話只係佢對綠城份中期業績有啲唔清楚咁話。
Joe過去經常有投資股票，最近喺五月底用咗百幾萬買咗少少博耳電力（01685），雖然到尋日帳面仲輸少少，不過大家不妨留意佢會唔會突然投資內房股。