絲絲知道早前國美（00493）、蘇寧同埋京東呢三間內地電器商，引發咗一場大規模嘅電器減價割喉戰。雖然事件已暫告落幕，不過各方嘅討論仍然繼續，最近又多咗一把聲音加入討論添！
呢位就係阿里集團主席馬雲，佢啱啱發表咗一篇文章，內容係對呢趟家電商割喉戰嘅反思。馬雲喺文章內講到，商場上兵不厭詐，如果對象係競爭對手「詐」一吓亦無礙；不過如果好似今次咁，三家公司口頭上話要減價，但又無任何實際行動，咁樣連消費者都「詐」埋就唔要得喇。佢仲話，今次呢件事拖埋一班消費者落水，惡性嘅割喉戰只會令佢哋自己都吃虧。
文章嘅矛頭似乎係指向引起割價戰嘅「罪魁禍首」—京東CEO劉強東。馬雲「稱讚」劉強東非常豪氣，竟然於一夜間就決定發動大規模嘅割喉戰，而且仲要透過微博宣布消息。但馬雲就質疑劉強東嘅「宣戰」言論背後到底有無調動公司資源配合，如果無嘅話，好容易令到員工懷疑上頭指令嘅真實性，會造成「狼來了」效應咁話。
絲絲知道馬雲呢番說話絕對係有的放矢，真人不說假話，呢次開腔，都係出自企業良心嘅觀點，好似阿里巴巴集團咁，就以良心對待自己員工之餘，繼早前提供低息貸款畀員工解決買樓安居外，最近又推企業信用貸款，給阿里巴巴所有會員添！
余詩韻