Market Insight：業績股隨時炒燶

港股主板成交縮到400億都冇，飯局中八到幾個賓架都話，多間歐、美資行都準備好大信封，等過埋八月就會陸續裁員，冀望在年終埋數前能夠輕身上路。今年債市旺到極，部分外資行有債券交易補貼都叫救命，更遑論單靠香港魚缸，塘水滾塘魚的低微佣金收入撐住的小證券行。

古勝近期同班炒家朋友傾開，先知道轉佢哋晒去啲殺價行交易，魚缸減佣成風，唔少標榜幾蚊佣金有交易，連大銀行都搞到五年買入免佣，證券行完全係夕陽行業一樣。

放大圖片

放大圖片

唔少人都好奇，去到一宗三、四蚊佣金交易，即使無紙化，香港寫字樓租金唔平，加埋薪資到底點樣維皮？老友話，證券行鬥到咁賤，無非個如意算盤想撐大個客戶基礎，等一朝好市重臨，成檔生意賣盤，實行蝕頭賺尾。

僧多粥少搵食艱難

唔知看官有冇同感，古勝認為股票行同手機網絡服務一樣，減價容易加價難，尤其平佣經紀通通無人招呼，客仔要自己用手機或電腦落盤，用X用Y或者Z股票行，分別其實唔係咁大（系統事實唔少來自外判商，一式一樣），電訊公司都仲算係獨市生意，來來去去得嗰幾間，香港C組經紀多過米舖，嚴格嚟講有438間，每日分到四百億成交裏面的9%左右，每間82萬元一日，仲要幾蚊佣，你話減價戰唔算飲鴆止渴，在下真係搵唔到第二個更加貼切的形容詞。

瑞聲似高處未算高

港股昨日波幅170點，收市跌81點報19,798點，A股恍如無底深潭，國企指數唔多唔少受牽連，收市下跌130點報9,544點，昨日平保（02318）中期業績唔單止衰，新業務價值開始由高增長轉入倒退期，審慎而言，應重新審視合理估值，股價昨跌2.6%，連埋國壽（02628）跌3.5%，兩隻股票佔國指跌幅三分之一。

比較意外係，連業績唔錯的建行（00939），上半年在淨利息意外擴闊掀動，業績增長14.5%勝過大行預期接近5%，都無辦法抵抗地心吸力，高開低收報5.22元，基金及普羅股民悲觀情緒，已蓋過客觀事實，主宰着大市。

調整市中亮點寥寥可數，美國加州法院裁定南韓三星要向蘋果公司的科技專利侵權，賠償逾10億美元，三星股價昨日急挫7.5%，協助蘋果公司生產微型喇叭的瑞聲科技（02018），股價急升7.1%報26.2元創上市新高。

瑞銀報告話管理層指引，話有大客出新產品推售（九成九係iPhone 5及Mini iPad），可望刺激銷情由第二季延續到第三季，目標價由28.5調高到31元。

珠寶股乘機炒落後

深圳再放寬來港個人遊門檻，分析員估計會增加410萬訪港人次，等於到訪旅客立即有15%增長。怕人逼，在下已經好一段時間無去銅鑼灣、尖沙咀一帶，新措施勢必會令購物區火上加油，昨日見尖沙咀及銅鑼灣的大地主九倉（00004）同埋希慎（00014）都逆市做好。至於莎莎（00178）、六福集團（00590）及英皇鐘錶（00887）都維持升勢至收市，最近唔少大孖沙都揀珠寶股炒落後，首選可睇隻六福。昨日倒跌收市的周生生（00116），周四會出成績表，近日業績期係唔係都隊一餐，故不妨等埋業績曝光都未遲。

古勝