內地樓市炒到慶合合，時不時都有擴大房產稅試點嘅消息流傳，不過房地產政策係國策，唔係咁易改變，所以好多時啲傳聞，最終都係「流料」，又或者最終要變番轉頭。
喺前日，網上瘋傳一則喺國土部網站公布嘅消息，內容指湖南、湖北嘅新版房產稅嘅徵收細則正在制訂當中，範圍包括個人已購嘅第二套存量房，徵收嘅稅率唔會太高，不過今次試點同上海、重慶唔同嘅係，計稅嘅依據由原來嘅房地產原值轉為市場評估價。
呢個消息嘅細節講到似層層，又註明咗來源係中國國土資源部，斷估都唔會有錯，點知國土資源部網站喺當日下午6點左右就撤銷咗呢個消息，唔知係咪意識到影響過於激烈呢！
個消息引起咁多討論，湖南、湖北當局當然要搵人出嚟回應一下，但出奇嘅係，佢哋所講嘅嘢差天共地。湖南省稅局話目前仲未就存量房徵房產稅一事有具體安排同部署，依家正在加強關於二手房交易評估價嘅監管工作。而湖北省稅局發言人就話，房產稅改革徵收細則正在制訂當中，但具體嘅徵收細節同方案出爐時間就仲未清楚。
究竟當初公布呢個消息係想測試市場反應，定真係想方案出爐，睇嚟得當事人至知。不過業內人士就話兩湖成為新嘅房產稅試點，係一定嘅事。
金占士