英超班霸「紅魔鬼」曼聯上市地點「棄港投美」，之不過上市以嚟股價表現麻麻，但就得到投資名宿索羅斯垂青！絲絲見到美國證交會（SEC）披露文件，索羅斯基金管理持有310萬股曼聯A股，佔總A股數量7.85%，相當於整家球會1.9%股權。
究竟索老投資喺曼聯係咪啱嘅投資就無人知喇，不過英國《金融時報》報道，以曼聯周一收市價計，索老嘅持股市值由佢買入成本4,340萬美元縮至4,050萬美元。索老都唔係第一次對球會有興趣o架喇，早喺○八年嘅時候，索羅斯曾經考慮過投資喺意大利甲組球隊羅馬，只係後來無成事啫。不過咁，曼聯上市後市值約23億美元，始終叫做成為咗全球最高價值球隊。
曼聯今個月十日首日喺紐交所掛牌以嚟，股價較14美元招股價累瀉6.7%，金融資訊公司Markit數據顯示，截至上周五為止，曼聯沽空比率達8.4%，係今年以嚟上市新股中嘅第14高，睇嚟市場就真係唔多buy佢囉！
好多機構投資者對曼聯無咩興趣，係因為曼聯唔派息，加上班主格拉沙家族持有嘅B股所享有嘅投票權係A股嘅10倍，令佢話晒事。而且，歷史證明，球隊上市都唔會有咩好結果，就好似美國NBA籃球隊波士頓塞爾特人喺八六年上過市，最後都除牌收場。