近兩年本港唔少富豪積極交棒畀第二代，其實內地民企老闆都面對接班問題。近日內地飲品業龍頭娃哈哈，傳有意斥資52億人仔收購英國聯合餅乾公司旗下零食分支KPSnacks，老闆宗慶后畀記者問到交易詳情，就話對單deal唔係好清楚，事關對外業務係由佢30歲嘅寶貝女宗馥莉操盤，有乜問題請大家去問佢個女喎。
宗馥莉同好多富二代一樣，細細個畀阿爸送去美國讀中學，大學主修國際貿易，到○四年先返內地進入娃哈哈開啟職業生涯。
佢依家喺娃哈哈進出口公司做緊總經理，負責集團進出口、國際化同海外購併嘅業務。公司員工話，佢同大老細宗慶后嘅管理方法有唔同，不過喺工作態度上就似足老竇，一日做足十幾個鐘，考察項目經常一日飛機來回，甚至連續一周飛七八個城市，十足工作狂人。
雖然宗慶后冇直接表態係咪同英國聯合餅乾傾緊收購，不過有市場人士話，浙江家族式企業一向都唔鍾意請職業經理人，其實宗馥莉一早就被欽點為娃哈哈未來嘅接班人，今次收購宗慶后肯定會喺幕後輔助，但係如果可以由宗馥莉操盤嘅形式完成收購，對佢將來嘅接班會好有幫助。