投資嘅嘢，時間性好緊要，好多時係啲創始股東或者早期投資者至賺到大錢，好似全球最大社交網站facebook（fb）咁，名氣咁大，但買佢哋嘅新股，真係輸到阿媽都唔認得，PayPal創辦人蒂爾就唔同喇，埋單計數，八年前50萬元（美元‧下同）（約390萬港幣）投資fb，依家賣到10億（約78億港幣）。
蒂爾係fb早期投資者，之後做埋fb董事。fb首批禁售股份呢頭話解禁，蒂爾嗰頭就沽貨走人。佢賣股份嘅平均價係19.73元，套現3.958億元，連同上市時出售1,680萬股，總值6.38億元，即係合共套現超過10億元，呢個數仲未包括喺fb上市前出售嘅股份，佢依家仲淨番大約1.12億元嘅fb股份。蒂爾八年前僅以50萬元入股fb，當時整家fb估值只有490萬元。
蒂爾係硅谷著名嘅天使投資者，九八年創辦電子支付網站PayPal，出任主席兼行政總裁，直至○二年以15億美元賣盤畀eBay，佢亦創辦對沖基金Clarium資本管理，投資多家社交媒體企業包括Zynga同LinkedIn。
喺股份解禁陰霾下，fb股價周一曾失守19美元，即較招股價38美元瀉逾一半，最低曾挫至18.75美元，但其後反彈，收報20.011美元，倒升5.04%。
點解fb個股價咁失威，好多人話fb犯咗上市估值過高嘅經典錯誤，依家公司高層嘅挑戰係要說服市場，fb唔單只係一股熱潮，管理層擁有賺錢嘅藍圖。Morningstar指fb股份差不多見吸引水平，但同時警告股價仍未見底。
余詩韻