金融徐筆：深國搞物流有得做
成日話港深一家，皆因兩地經濟來往密切，貨櫃車各樣往返頻密，絡繹不絕。深圳國際（00152）做咗物流基建好耐，有好多項目依家仍然營運緊，可以向客戶提供唔同種類嘅物流增值服務，需求都十分殷切。
面對挑戰日漸增多嘅經濟現況，生存落嚟嘅公司已經百煉成鋼，總有兩三度散手！以佢近期嘅創新發展理念嚟講，管理戰略上又的確比佢發揮得唔錯。近幾年集團都成功提高咗自己嘅效率，無論內部資源分配，又或者改善現有主營業務，都做出咗成績。
增持深航提升回報
增持深圳航空股權，呢個動作成功幫公司進一步提升盈利，已經係一件事實！集團用咗7.89億元人民幣，令集團持有嘅深圳航空股權由25%增加至49%。喺目前兩地股市冇被搶高嘅情況下進行呢項收購，由於有充分嘅價位緩衝，相信會好大程度拉高咗深圳國際嘅股東回報！近年集團亦積極擴張，例如積極投資喺物流園區身上，改善既有設施，又或增置生財工具。
最重要嘅當然係實效！近幾年嘅動作的確令佢物流業務取得較快增長。單以上年度睇，集團嘅物流業務股東應佔盈利就錄得顯著增長。
講咗咁耐，Prof. J少不免睇吓集團嘅業績。集團一一年度盈利增長36%左右，每股盈利增長約18%，市盈率頗低，只有4.78倍，周息率6厘，可攻可守。繼續追蹤、出發！
香港大學電子金融服務榮譽助理教授 徐燦傑