雷士照明（02222）前日嘅公司通告，揭露咗好多不為人知嘅內幕，絲絲真係大開眼界，兩派人招來招往，睇到眼都花，尋日有個局外人都加入戰團喎！
呢個局外人就係曾經參與唯冠iPad商標案嘅諮詢公司和君創業，佢哋尋日開咗個發布會，話受小股東所託，向董事會發公開信，要求佢哋清查吳長江種種嘅不當行為。
公開信入面就批評，吳長江強行將公司總部搬去重慶，經銷商又提供個人貸款呢啲行為，涉及職務侵佔，同內部腐敗，又批評董事會無所作為，希望佢哋可以即刻糾正呢啲行為，同埋向中港兩地監管當局舉報立案，查辦所有犯罪行為。
不過和君創業創辦人李肅對於到底係受邊個委託、有幾多個小股東，同所佔股權呢啲問題都冇正面回答，所以好多人都覺得有古怪。李肅話自己已經買咗雷士嘅股票，仲諗住搵方法做埋雷士嘅董事，或者會參與雷士同經銷商嘅重組添！