香港運動員再次喺奧運取得佳績，相信大家都感到與有榮焉，一向都有獎勵績優運動員嘅恒生銀行（00011），實行加碼100萬元獎勵。
勇奪銅牌嘅單車選手李慧詩，恒生更早已透過運動員獎勵計劃頒發75萬元獎金。恒生呢位「財神爺」再派錢，今次就特登打造咗42面「財神金牌」送畀每一位出戰奧運嘅香港運動健兒；唔單止咁，恒生仲額外撥出100萬元，獎勵打入比賽第四至第八名嘅運動員添。
其實恒生對香港運動員嘅支持有目共睹，唔單止奧運，喺亞運、東亞運以至全運會入面表現出色嘅香港運動健兒，恒生都曾經頒發獎金鼓勵，咁多年嚟已發放超過2,840萬元。
絲絲仲記得，李慧詩喺星期五深夜比賽，第二朝絲絲好悠閒咁歎緊早餐嘅時候，已經見到恒生副董事長兼行政總裁李慧敏（Rose）恭賀李慧詩嘅電郵，連星期六都咁高效率，唔通Rose都有捱夜睇比賽，支持香港運動員？