花旗銀行為咗慶祝集團二百歲生日，今年都搞咗唔少活動，尋日又有新猷，佢哋喺香港嘅金融中心地標IFC，整咗間誌慶中心，佢哋好自豪咁話「開舖嘅籌備用咗九日咋！」會唔會破咗銀行界紀錄？
呢個中心嘅設計非常有時代感，花旗環球個人銀行服務行政總裁及總經理盧韋柏（Weber）解釋，中心係用咗智能銀行（Smart banking）嘅概念。咩係智能銀行？即係精簡銀行服務程序，盡量用電腦取代紙張，同埋減少所需人手，Weber話，中心面積雖然唔似其他銀行有3,000呎，但係分行服務一應俱全，仲可以節省租金添。原來智能銀行好處咁多，唔怪之得Weber話，想喺三年之內將全線分行打造成智能銀行啦。
除咗開舖時間火速完成之外，中心仲有另一個「驚人創舉」，就係「二十分鐘批核信用卡」，過程仲係全電腦化添，有咁吸引嘅服務，難怪Weber有信心，中心可以為商場帶嚟人流啦，依家每日嘅人流已經有超過200人次喇。
中心一個星期開足七日，每日開放時間朝九晚九，每逢周末仲會舉行魔術同氣球造型表演。誌慶中心嘅租期淨係得兩個月，想去感受吓乜嘢係Smart banking，要趁早喇！