絲絲講場：葉茂林仔女 助陣打天下
喺現代社會做到「子承父業」已經好難，仲要三個仔女都做到，呢種都係福氣嚟嘅。邊個咁有福氣？咪就係耀才證券（01428）嘅老細葉茂林，三個仔女都已經入晒公司，佢話希望佢哋可以快啲接手，等老竇環遊世界咁話喎。
前幾個月絲絲先同葉生嘅二女Jacquelyn傾開偈，嗰時佢都係啱啱返公司幫Daddy手，專做admin、HR方面，尋日佢同絲絲分享佢呢幾個月嘅工作心得，仲介紹咗佢細佬Ron畀絲絲識，話佢都返咗嚟公司幫手一個月左右，主力做對外online marketing。
唔like佣金二級制
計埋大哥做IT，即係話三兄妹都已經回晒巢喇喎，咁Daddy係咪可以部署退休呀？絲絲即刻問葉生，佢笑到好燦爛咁答：「係就好呀，仲愈快愈好添呀！要快啲享清福！」
講開又講吖，金魚缸呢排靜到不得了，好多散戶同絲絲一樣無乜眼睇。業界呢排嘈到拆天，一方面有人打減佣戰，只收幾蚊雞佣金，另邊廂有人要求恢復二級佣金制。
葉生信奉自由派，唔like二級制，佢認為佣金二級制對證券行嚟講有利，但會拉高投資門檻，打擊散戶入市嘅動力，而且唔符合自由交易，又形成壟斷市場，所以一於反對到底，葉生仲話，之前實施過一段時間之後撤銷咗，唔應該走回頭路囉！佢哋近日收集咗近萬個散戶嘅簽名，幫佢哋發聲。
余詩韻