國美電器（00493）啱啱先為中期業績發盈警，轉頭又傳大股東黃光裕喺月初已經將國美商都賣咗畀海航集團，不過售價就低過60億元人民幣，同○九年放售叫價嘅100億元人民幣相比等如打咗六折。之不過海航集團品牌中心負責人就同絲絲講，單收購仲傾緊，已經去到關鍵時刻，但當中有好多細節要傾，依家仲未去到傾收購價嘅階段喎！
國美商都曾經被國美電器視為商業地產旗艦項目，黃光裕喺○五年以8.05億元人民幣取得地塊，但喺發展上一直未有定案。近日內地媒體報道就話，隨住黃光裕入獄、宏調措施、國美缺乏有經驗嘅專業商業地產管理團隊，加上國美電器上市部分嘅業務喺上半年出現虧損，令到黃光裕決定賣資產去「保主業」。
絲絲尋日就同國美電器董事兼副總裁鄒曉春傾咗陣，佢話國美商都係黃光裕全資擁有，同上市業務無任何關係，就算賣咗都唔會對公司構成任何影響。佢仲話大股東喺事前都無同公司溝通過。不過，消息傳出後股價受壓，逆市跌咗1.37%。