雷士照明（02222）高管內訌事件搞足幾個月，現任董事長閻焱並無喺上周五限期前，一償供應商同員工願望——畀吳長江回朝。尋日雙方進一步「互片」，發公開信數落對方。
內地網站更引述雷士副總裁徐風雲，話佢已經遞咗辭職信，等緊董事會批。佢被視為吳長江派系人士，仲作咗首詩表達對近期事件嘅失望。吳長江就話知道佢辭職，對於任何高管去留，真係冇法勸阻。
吳長江係雷士創辦人，喺5月辭職，由基金股東賽富管理人閻焱，同策略股東施耐德代表張開鵬，分別繼任做董事長同總裁，但係雷士員工、管理層同供應商一直都唔服新董事會，之後就無日安寧，日日講條件，誓要畀吳長江回歸。
但係閻焱嗰邊就不斷咁拖延，遲遲都畀唔到確切答覆，依家連供貨商都斷埋供應，尋日「吳長江派」仲以「全體雷士人」嘅名義發咗封公開信畀賽富嘅投資者，數臭依家班管理層。兩方態度都咁強硬，最慘嘅係小股東，股份停牌，都唔知幾時至可以自由買賣呢！