「家電下鄉」政策對行業銷售刺激有限？唔緊要，絲絲對內地家電嚟緊呢段時間嘅銷情好有信心，事關由京東商城CEO劉強東撩起嘅割喉減價戰會由今日朝早九點開始，京東話保證所有大家電售價會平過國美同蘇寧一成以上。
蘇寧就宣稱，如果價格高過京東唔單止會即時減價，仲會賠償消費者兩倍差價咁多，消息令啲網友心花怒放，連原本冇諗住買嘢嘅人都忍唔住，話要考慮去執平貨。
京東商城CEO劉強東尋日喺微博率先宣戰，話由即日起，要用「零毛利」政策同國美蘇寧決一死戰，保證京東所有嘅大家電商品，會比國美、蘇寧連鎖店平最少一成以上，仲計劃用唔低過三千蚊嘅人工，喺全國請夠五千個價格情報員，用嚟確保公司售價最平。
咁鬼高調，當然會引起同業嘅不滿啦。蘇寧旗下網上購物商城蘇寧易購嘅執行副總裁李斌就即時還以顏色，宣布由今日九點開始，保證包括家電在內嘅所有產品，價格必然低過京東，如果唔係就會即時調價，仲會賠番兩倍差價畀已經買嘢嘅消費者。
針對劉總喺微博講，三年內如果有採銷人員喺大家電產品加一蚊毛利都會即炒，李斌就話，一定可以幫劉總「提前、超額」完成裁員目標喔。